A Asociación STOP, Solidarios cos Maiores, Marisol Soengas, Nauterra e o Parlamento de Galicia recibiron os Premios Solidarios Grupo Social ONCE Galicia 2026, nunha gala celebrada este mércores no Teatro Colón da Coruña.

Estes premios son a máxima distinción que concede o Grupo Social ONCE no ámbito autonómico e teñen como obxectivo recoñecer as persoas físicas ou xurídicas que sobresaian polo seu labor solidario na súa contorna de influencia. Na gala, da que informou a organización nun comunicado, interviñeron, entre outras autoridades, o presidente do Parlamento de Galicia, Miguel Ángel Santalices; a vicepresidenta da ONCE, Patricia Sanz; a conselleira de Política Social, Fabiola García; o presidente da ONCE en Galicia, Carlos Fernández; e a valedora do Pobo, Dolores Fernández Galiño.

O PARLAMENTO, RECOÑECIDO POLO SEU COMPROMISO COA INCLUSIÓN

Na categoría de Administración Pública, o galardón recibiuno o Parlamento de Galicia. Recollérono o actual presidente, Miguel Ángel Santalices, e tres dos seus antecesores: Tomás Vidal, José María García e Pilar Rojo. A ONCE destacou que a Cámara galega é o máximo órgano representativo do pobo galego e que, máis alá do seu labor lexislativo e de control do Executivo, consolidou un modelo pioneiro de apertura social, participación cidadá activa e compromiso cos dereitos da infancia e dos colectivos vulnerables, mediante iniciativas continuadas de sensibilización, o impulso da iniciativa lexislativa popular e a celebración de plenos solidarios.

Ademais, sinalou que se trata dunha institución pública transparente, empática e vertebradora das demandas das organizacións non gobernamentais e dos colectivos en situación de exclusión, que impulsa a escoita activa da cidadanía mediante comisións, peticións e encontros da economía social. Ao recibir o recoñecemento, Santalices destacou o compromiso do Parlamento coa inclusión e a plena integración das persoas con diversidade funcional. Ademais, animou o conxunto da sociedade galega a apoiar e a comprometerse na loita pola súa integración en todos os ámbitos, e cualificou este compromiso como "un obxectivo irrenunciable" da Cámara.

ASOCIACIÓN STOP: DA RECUPERACIÓN Á SOLIDARIEDADE COA INFANCIA

No apartado de Institución ou ONG, o premio recibiuno a Asociación STOP, fundada en Vigo en 2009, que naceu para apoiar a recuperación, rehabilitación e reinserción de persoas con problemas de alcoholismo. Ese mesmo ano puxo en marcha a campaña solidaria "Cada Niño un Juguete", unha iniciativa na que quen o desexe pode doar xoguetes para axudar a nenos e nenas desfavorecidos e favorecer que poidan gozar da súa infancia, garantindo o seu dereito ao xogo e fomentando valores de solidariedade.

SOLIDARIOS COS MAIORES, CONTRA A EXCLUSIÓN DIXITAL E A SOIDADE

Na categoría de Programa, Artigo ou Proxecto de Comunicación, o galardón recibiuno Solidarios cos Maiores, unha iniciativa comunitaria e de concienciación social nacida na Coruña e integrada por xornalistas e profesionais da comunicación como Chus Castro, Sabela Romar, Bea Soler, Amalia Baltar, Manolo Rodríguez ou Lucía Aller. O movemento xorde como resposta directa á fenda dixital, á soidade non desexada, ao idadismo e ao paulatino desmantelamento da atención presencial nos servizos básicos, como a banca, a Administración pública e a sanidade.

Traballa para que a dixitalización non supoña a exclusión das persoas maiores e para que se garanta unha atención humana, presencial e accesible en todos os ámbitos comunitarios. Así, desenvolve campañas de concienciación e crea contidos audiovisuais para informar e apoiar as persoas maiores no seu día a día. Tamén impulsa accións conxuntas, charlas e encontros comunitarios que reúnen máis de 1.800 participantes ao ano, conectando colectivos de maiores con profesionais da comunicación e da psicoloxía.

MARISOL SOENGAS, CIENCIA E COMPROMISO SOCIAL

O premio na categoría de Persoa Física recibiuno Marisol Soengas, unha das científicas galegas máis recoñecidas e unha das referentes españolas na investigación contra o cancro. Recibiu múltiples premios e recoñecementos polo seu labor na investigación do melanoma, o tipo de cancro de pel máis agresivo, como o Premio María Josefa Wonenburger Planells ou o Premio Carmen y Severo Ochoa en 2021, así como o Premio Fernández Latorre en 2023.

Entre os seus logros máis recentes, o seu equipo descubriu como unha proteína chamada Midkine permite que os melanomas eviten o recoñecemento por parte do sistema inmunitario, o que complica o desenvolvemento de terapias efectivas. Na actualidade, dirixe o Grupo de Melanoma no Centro Nacional de Investigaciones Oncológicas (CNIO) e, ademais, é decana de Asuntos Científicos, onde lidera investigacións pioneiras sobre os mecanismos de resistencia do melanoma á inmunoterapia.

Ademais do seu labor científico, Soengas é unha defensora activa da igualdade de xénero na ciencia e na investigación. Promove iniciativas para reducir a fenda de xénero e fomentar vocacións científicas entre nenas e mulleres, e é a fundadora do grupo "Mujeres influyentes de Galicia", que busca visibilizar o talento feminino en Galicia. Aínda que traballa en Madrid, segue implicada coa súa terra, promovendo talentos locais e participando en iniciativas educativas e culturais que enriquecen a comunidade.

No seu papel como presidenta de ASEICA (Asociación Española de Investigación sobre o Cancro), Soengas impulsou proxectos para apoiar investigadores novos, promover redes colaborativas e fortalecer a investigación do cancro en España. A organización destacou a súa dedicación tanto ao progreso científico como ao benestar social, así como o seu sentido de responsabilidade cara aos demais, como exemplo de que a excelencia profesional pode ir da man do compromiso solidario.

NAUTERRA, CONTRA A POBREZA ALIMENTARIA E POLA INSERCIÓN LABORAL

Finalmente, na categoría de Empresa, o premio foi para Nauterra, fundada como Grupo Calvo en Carballo en 1940, un grupo agroalimentario global co ..