La iniciativa IMSERSO-CNSE, qu'axunta a participantes de toa España, ufierta un itinerariu cultural y patrimonial ensin torgues de comunicación pol Principáu Un centenar de persones sordes de diferentes puntos d'España participen dende esta fin de selmana n'Asturies nuna nueva edición del Programa de Turismu y Termalismu IMSERSO-CNSE. Esti proyectu, qu'integra la Llingua de Signos Española (LSE) como elementu clave de la esperiencia turística, va percorrer dellos de los principales enclaves culturales, patrimoniales y naturales del Principáu hasta'l próximu vienres, 9 d'ochobre.
  La Colexata de San Xuan Bautista de Xixón acoyó esti llunes l'actu d'apertura oficial d'esti alcuentru, que nesta ocasión cunta como anfitriona cola Federación de Persones Sordes del Principáu d'Asturies (FESOPRAS). La iniciativa ta empobinada a garantizar que los participantes puedan esfrutar de la ufierta d'ociu y cultura ensin torgues de comunicación.
  Mientres l'actu d'inauguración, la presidenta de FESOPRAS, Paula Fernández, remarcó la importancia d'estender l'accesibilidá d'un mou habitual na sociedá y na axenda cultural asturiana: «Queremos qu'Asturies seya una tierra que cualesquier persona sorda pueda conocer, esfrutar y vivir plenamente en llingua de signos».
  Pola so parte, la representante de la Confederación Estatal de Persones Sordes (CNSE), Esther de los Santos, recalcó l'impactu del proyectu nel exerciciu efectivu de los derechos d'esti colectivu: «Tener derechos significa tamién tener derechu a esfrutar. Derechu a viaxar. Derechu a conocer el nuesu patrimoniu. Y derechu a facelo na to llingua propia».
  El programa d'actividaes inclúi un itinerariu diversu pel territoriu asturianu. Tres la recepción institucional y una visita per Xixón, que contempló'l cascu históricu y La Llaboral Ciudá de la Cultura, les persones participantes van treslladase a otres llocalidaes de la rexón.
  L'axenda d'estos díes contempla visites a la Granxa-Quesería Los Caserinos, en Villaviciosa; a Cangues d'Onís y al Santuariu de Cuadonga; al Ecomuséu Mineru del Valle de Samuño, en Llangréu; mesmo qu'a les ciudaes d'Uviéu y Avilés, y a la villa mariñana de Cuideiru. Toles visites y percorríos cunten col sofitu d'intérpretes y servicios afechos pa garantizase na so totalidá en llingua de signos.
  Esta iniciativa ye posible gracies a la collaboración conxunta del IMSERSO, del Gobiernu del Principáu d'Asturies, del Conceyu de Xixón, del Conceyu de Llangréu, de la Fundación Cajastur y de la Fundación ONCE.
  El programa de turismu accesible IMSERSO-CNSE lleva más d'un deceniu desenvolviéndose en distintos puntos d'España. La so meta principal ye emburriar l'ampliación d'una ufierta turística inclusiva qu'entá ye llendada pa les persones con discapacidá auditiva, al tiempu que promueve la convivencia y l'intercambiu d'esperiencies ente participantes de distintes comunidaes autónomes.