Haur itsuen eta ikusmen urriko haurren hezkuntza ONCEren gizarte-plangintzako zereginetako bat da. Gaur egun, 8.500 haur eta gaztek dute ONCEren hezkuntza-laguntza: batzuek instituzioko zentroetan egiten dituzte ikasketak; besteek, ikastetxe arruntetan ikasi arren (ikaslea bere ingurunetik ez ateratzeko), hezkuntza-laguntzarako taldeen laguntza jasotzen dute.

ONCEk laguntzen jarraitzen du ikasleak unibertsitatean edo lanbide-heziketan daudenean ere. Ikasle itsuek behar dituzten testu-liburuak haien esku jartzen ditu, braillera transkribatuta, soinu-euskarrietan edo euskarri elektronikoetan. Bestalde, ikasketa-lekua egokitzen ere laguntzen du ONCEk.

Horrez gain, Madrileko Unibertsitate Autonomoari adskribituriko Fisioterapiako Unibertsitate Eskola bat du erakundeak; izan ere, lanbide hori, oso egokia izateaz gain, lan-iturri ona ere bada itsuentzat.

Itsuak diren edo ikusmen urria duten haur eta gazteen hezkuntza-eremuko ikerketa sustatzeko, Eskola Esperientziei buruzko Hezkuntza Ikerketarako Lehiaketa antolatzen du ONCEk urtero. Arlo horretan lan egiten duten Espainiako, Europa osoko eta Iberoamerikako profesionalek hartzen dute parte lehiaketa horretan.